వైకుంఠ ఏకాదశి సందర్భంగా తిరుమలలో భక్తుల కోసం అన్ని ఏర్పాట్లు చేశాం: బీఆర్ నాయుడు

వైకుంఠ ఏకాదశిని పురస్కరించుకుని డిసెంబర్ 30 నుంచి పది రోజుల పాటు జరగనున్న వైకుంఠ ద్వార దర్శనానికి తిరుమల తిరుపతి దేవస్థానం (టీటీడీ) అన్ని ఏర్పాట్లు పూర్తి చేసింది. భక్తులకు ఎలాంటి అసౌకర్యం కలగకుండా పకడ్బందీ చర్యలు చేపట్టినట్లు టీటీడీ చైర్మన్ బీఆర్ నాయుడు తెలిపారు. సోమవారం ఆయన ఈవో, ఇతర బోర్డు సభ్యులతో కలిసి క్షేత్రస్థాయిలో ఏర్పాట్లను పరిశీలించారు.

ఈ సందర్భంగా బీఆర్ నాయుడు స్పందిస్తూ, "గోగర్భం డ్యామ్ సర్కిల్, శిలాతోరణం వద్ద ఏర్పాటు చేసిన క్యూలైన్లు, సదుపాయాలను పరిశీలించాము. SSD టోకెన్ల తనిఖీ కేంద్రాల పనితీరును సమీక్షించి, భక్తులకు ఇబ్బందులు లేకుండా చూడాలని అధికారులను ఆదేశించాం. పోలీస్, విజిలెన్స్, టీటీడీ యంత్రాంగం సమన్వయంతో పనిచేస్తూ, ఇంటిగ్రేటెడ్ ఏఐ కమాండ్ కంట్రోల్ సెంటర్ ద్వారా రద్దీని పర్యవేక్షిస్తున్నాం" అని వివరించారు.

ఏకాదశి రోజున సుమారు 70,000 మంది భక్తులకు దర్శనం కల్పించాలని లక్ష్యంగా పెట్టుకున్నామని, ఇందుకోసం 20 గంటల సమయం కేటాయించామని ఆయన తెలిపారు. డిసెంబర్ 30 నుంచి జనవరి 1 వరకు టోకెన్లు పొందిన భక్తులను మాత్రమే దర్శనానికి అనుమతిస్తారు. ఆ తర్వాత జనవరి 2 నుంచి 8వ తేదీ వరకు ఎలాంటి టికెట్లు లేకపోయినా సర్వదర్శనం కల్పిస్తారు.

భద్రతా ఏర్పాట్లలో భాగంగా 3,000 మంది పోలీసు సిబ్బందిని మోహరించారు. ఆలయాన్ని సుమారు 50 టన్నుల సంప్రదాయ పుష్పాలు, 10 టన్నుల పండ్లతో శోభాయమానంగా అలంకరించారు. ఏకాదశి నాడు శ్రీవారు స్వర్ణ రథంపై మాడ వీధుల్లో విహరించనుండగా, ద్వాదశి నాడు స్వామి పుష్కరిణిలో చక్రస్నానం నిర్వహిస్తారు.